إزاي تضمن قبولك في أي إنترفيو؟

إزاي تضمن قبولك في أي إنترفيو؟

الإنترفيو من أهم المشاكل اللي الشباب بيقابلوها عشان يشتغلوا، لإن باقي المراحل سهل جداً تعديها، لكن الانترفيو بيحدد قبولك أو ترشيحك للوظيفة من عدمه..
عشان كده في تريكات لو عملتها هتعدي من الانترفيو بسلام وتتقبل في الوظيفة لو كانت مناسبة لخبراتك، لإن أحياناً التوتر أو نقص شوية معلومات أو حتى طريقة الكلام بتضيع منك وظايف كتير رغم إنك عندك الخبرة المطلوبة عشان تبقى فيها!
ابحث عن تاريخ الشركة والمجال اللي هي شغالة فيه –
أول ما يتحدد لك ميعاد الإنترفيو، ابدأ طلع معلومات عن الشركة من خلال الويب سايت بتاعهم والسوشيال ميديا، اعرف آخر أخبارهم، وحاول تطلع نقط ضعف ناقصاهم تتكلم عنها، اعرف مين العملاء بتوعهم وبيشتغلوا معاهم إزاي عشان تعرف تتكلم لو اتسألت أي سؤال بخصوص المجال نفسه أو عن الشركة.
ركز على سبب حاجتك للشغل ده بالأخص والشركة دي نفسها –
كل ما تديهم أسباب إنت ليه هتشتغل معاهم وليه عايز تشتغل عندهم هما خصوصاً، كل ما هتزيد نسبة قبولك في الوظيفة، لإنك بتديلهم أسباب يشغلوك عشانها.
لما يشوفوا فيك دافع حقيقي للشغل غير الأوفر الكويس والزهق من قعدة البيت، هتشتغل معاهم.. عرّفهم إنت ليه أكتر واحد مناسب للوظيفة دي دوناً عن غيرك وجهز إجابات الأسئلة دي قبل الانترفيو.
حط نفسك مكان الإتش آر وجاوب على أسئلته –
حط في دماغك إنك مش الوحيد المتقدم للوظيفة دي، عشان كده لازم يكون عندك شئ مميز يخليهم يقبلوك، الإتش آر دايماً بيفكر وبيدور فيك على ميزة تخليك معاهم وعيب يخليك أقل احتمالية للقبول.
لو مثلاً مكانك بعيد جداً عن الشركة وعارف إن دي بالنسبة لهم مشكلة لإنك هتتأخر، قول أنا عارف إن المكان بعيد جداً لكن مع ذلك أنا مجهز نفسي إني هبقى موجود في الميعاد بالظبط طول الوقت والموضوع مش هيسبب لي مشكلة. وياريت لو تجاوب على السؤال ده من غير ما يتسأل.. ساعتها الإتش آر هيبص لك نظرة مختلفة ويوافق عليك.
جهز للإنترفيو وأسئلته الغير متوقعة –
دايماً بيبقى في أي انترفيو –خاصة لو شركة كبيرة- أسئلة غريبة بتقيس الإبداع والرؤية بتاعتك زي شايف نفسك فين كمان 5 سنين؟ وهكذا.. حاول تعرف إجابات الأسئلة دي قبل ما تروح وتبقى جاهز إنك ترد بثقة من غير توتر.
شكلك وطريقة كلامك أهم من الكلام نفسه –
حاول تعرف من اللي كلمك المطلوب لبس فورمال ولا سيمي فورمال ولا عادي؟ لإن في شركات كتير بتحكم عليك من اللبس، وفي شركات تانية مش بيفرق معاها الموضوع ده، بس الأكيد إن يكون لبسك مناسب للمكان وشكلك كويس.
حافظ على تون صوت وطريقة كلام مرنة، لو اتوجه لك سؤال محبتوش أو في تهكم بأي نوع حاول ترد بدبلوماسية وهدوء من غير أي زعل لإنك المفروض تكون بروفشنال في الرد.
بشكل عام، الإنترفيو تحديد مصير وظيفة أحلامك، بس مش معنى كده إنك توقف حياتك عشان مجالكش وظيفة معينة عايزها، لكن الأحسن تقدم في مجالات بتحبها وفي شركات كبيرة وصغيرة وتنزل إنترفيوز كتير واحدة واحدة هتلاقي شركة مناسبة ليك وهتلاقيهم قبلوك حتى مع نقص الخبرة أو بعض العيوب التانية.
ولو بتدور على شركة مناسبة ليك، دوت كولرز هي وسيط ما بينك وبين الشركات، هدفها توصلك لأكتر شركة مناسبة بناءً على خبرتك وعلى مهاراتك وعلى أوفر الشركة المناسب ليك. اتواصل معانا.