خطوات أساسية لزيادة إنتاجية شركتك

خطوات أساسية لزيادة إنتاجية شركتك
كتير من الناس بتدور على الإنتاجية العالية وكمية الشغل اللي المفروض تخلص وبيفرحوا لما بيلاقوا الموظفين طلعوا شغل كتير لكن بيهملوا الكفاءة.. وهل الشغل اللي طالع كويس ده بنفس المستوى المطلوب؟!
.. كمدير شركة أو فرع أو حتى تيم ليدر لازم تكون فاهم مبدأ مهم جداً
TIME IS QUALITY
TIME IS MONEY .. على عكس السائد والمنتشر إن
لإن كم الشغل مش أهم من جودة الشغل.. واستغلالك لكل دقيقة الموظف قاعد فيها على مكتبه مش شطارة.. طب أعمل إيه؟!
.. إزاي أزود الإنتاجية والشغل من غير ماقلل من الجودة
دي نقط مهمة لو خدت بالك منها في احتمال كبير إن الإنتاجية والجودة يزيدوا مع بعض أو عالأقل تحافظ على نفس جودتك السابقة

زيادة المرونة في سيستم الشركة

يعني مش لازم لما الموظف يتأخر دقيقتين يخصمهم، متبقاش رخم ومتقفش عالواحدة
خليك عارف إن الغلطات الكتير للموظف مش شئ يستحق العقاب، مادام مش نفس الغلطة هي هي .. خليك مرن وعلّمه واحدة واحدة..
متحسبش وقت البريك بالمللي وخليك مرن اللي عايز ياخد بريك ياخد، اللي حابب يكمل شغل يكمل، اللي عايز ياخده في آخر اليوم مفيش مشكلة.. خلي موظفينك هما اللي يتحكموا في وقتهم مش انت اللي تقولهم يقسموه إزاي
لما تزود المرونة بشكل عام في كل حاجة وتتقبل اختلاف الآراء والموظفين عن بعض من غير تمسك ولا تعصب لرأي لازم تمشيه عشان انت صح.. ساعتها الموظف هيرتاح في المكان.. ولما يرتاح هننقل للخطوة التانية.

زيادة القدرة على الإبداع للموظفين

هنا الموظف ارتاح وحس بالانتماء للمكان اللي بيحقق له مش بس مكسب ولا إنجاز بسيط في شغله، لكن كمان راحة جوه المكان، ساعتها هيبدأ يفكر من منطلق إنه واحد من الشركة وعايز يطلع أحسن أفكار، مش إنه حد جاي يقضي شغل وخلاص!
طيب إزاي تزود إبداع الموظف؟
ممكن باجتماعات عصف ذهني أو Brainstorming القسم كله بيطلع فكرة واحدة أو بيحل مشكلة، شاركهم المشاكل اللي بتدور في دماغك كمدير وحاول تسمع منهم رأيهم كـ problem solvers قادرين يشوفوا الحاجات اللي انت مش شايفها
كمان ممكن تعمل competitions وتخلق منافسة صحية بين التيمز وجايزة كويسة للي هيطلع أكتر فكرة مبدعة والشركة هتصوّت عليها عشان تطلّع الفايز
متنساش إن ديكور الشركة ومدى راحة العين جوه الشغل بيفرق جداً في النفسية، فاتأكد دايماً إن مفيش حد محتاج حاجة ناقصاه أو مش عاجبه مكانه لإن ده بيفرق فعلاً

اتأكد من سلامة تعامل الرؤساء والمديرين والتيم ليدرز مع الموظفين

خلاص الموظف إرتاح وبدأ يفكر بشكل مبتكر؟ بس كل ده هيبوظ لو فوقيه مدير رخم أو تيم ليدر مش مقدر مجهوده، مفيش مشكلة لما تعيد هيكلة الشركة من جديد في سبيل إن كل واحد يعمل شغله على أكمل وجه، ومتنساش إن المدير شغله هو الإدارة، والإدارة جزء منها إدارة دوافع وشغف الموظفين واستغلالها بشكل صحي، أكتر من إدارة موارد الشركة وتحميل الموظفين فوق طاقتهم
هتبقى لفتة لطيفة منك لو عرفت ميزة كل واحد عندك إيه وإيه اللي بيحركه ناحية الشغل والإنتاج وتبدأ تشتغل على ده عشان تطلع أحلى شغل
ولو مش هتقدر أو عدد الموظفين كتير يبقى لازم تتأكد إن رؤساء الأقسام مش مقللين من قدرات ومجهود حد
لو عملت التلات خطوات دول أضمن لك شغل أكتر بنفس الجودة إن مكانتش جودة أعلى بكتير.. الموظفين هينتموا للمكان وهيبدأوا يعاملوه على إنه مكانهم بس مش بشعارات إنت بتقولها لأ بتصرفات حقيقية بتثبت لهم إنهم مش قابلين للاستبدال

لطلب نصائح واستشارات بخصوص شركتك اضغط هنا